عزي لقلبٍ مع هوى الزين مطواع
اطوع من الطفل الرّضي للرضاعة
لولا يضمنّه محاديب الاضلاع
جزّل معاليقه بقوّ انتفاعه
على وليفٍ كمّله حسن الاطباع
كل السجايا الطيّبه من طِباعه
حلو النبا كن الشهد في فمه ماع
زين الحلايا والنّقا من اطباعه
كن للقمر في لبة الزين مطلاع
من دونه الحمره غشاها شعاعه
راعي جديلٍٍ فوق الارداف منثاع
ذيل العسيف اللي عليها الطّماعه
والخصر بطن مسلوع الظبي الى جاع
خطرٍٍ عليه من الهبوب انهزاعه
حبّه مخلٍٍّ في ضميري تهملاع
من سبته ماهملج الطرف ساعه
تسهر عيوني والمخاليق هِجّاع
كِني إصبيٍٍ جاير الوقت لاعه
يشوف فرقاً ماوراها تِجمّاع
يتيم واضاق به الفضا باتساعه
من حبها جوفي تمزع تمزّاع
مزع العسايف للرشا وانقطاعه
تهشمت من طول فرقاه الاضلاع
والجرح من فرقاه زاد اتساعه
يومي الفؤاد اوما مسابيق مقلاع
في يد نشيط ماهرٍ باندفاعه
بقيت انا من طول فرقاه ملتاع
وذكره على قلبي يزيد التياعه
ياوين من يبخص بعلّات الاوجاع
خصٍٍ بعلّات القلوب الوجاعه
ضاقت بي الدنياعلى كثر الاوساع
قسا علي الوقت والقلب طاعه
ياما عذلت القلب والقلب ماطاع
يفر من جوفي فرير الزّعاعه
مَنّيت نفسي لكن الوقت خدّاع
والقلب عن رجواه صعبٍ اقناعه
ياراكب اللي مابعد داج بالقاع
جيبٍ من المصنع حديث الصناعه
الى مشى بارضٍٍ عتش له تهزاع
ممشا هنوفٍ بالغنج والدلاعه
منصاه للي بالمواجيب بتّاع
فهد الى عدّو رجال الشجاعه
وجدي عليهم وجد من قام مرتاع
على فراق ابوه زاد انفجاعه
أوْ وِجْد من لاله على النوم مهجاع
مسّوا على لوح الجباير اذراعه
مير الرجا باللي عليمٍ بالاوضاع
وعلى الولي وصل الحبل وانقطاعه
الله يجعل لّه على نجد مرجاع
ربي يلم الشمل عقب انقطاعه
للشاعر ،،،
ابن عامر البدارين
ليست هناك تعليقات:
إرسال تعليق